頭先收工和一個同事一齊行,
原先是傾一點點關於天氣...  水溫的問題,
之後就講到游水...

Jimmy: 咁你上次係去o左游水定玩水呀?
同事C:  游水, 我帶曬水泡的.
Jimmy: 帶水泡就係游水的了?
同事C:  唔係, 去海中間度的~~~
(我正奇怪中....  再問.)
Jimmy: o係海中間?  去海中間就係游水的了?  咁點樣係玩水呀?
同事C:  o係海邊咪就係玩水law~~~
Jimmy: 咁泳池中間呢?
同事C:  游水
Jimmy:  泳池邊呢?
同事C:  游水...Um...  係, 游水.
(更大不解...)
Jimmy:  即係o係泳池中間, 則邊和海中間落去的都係游水, 獨獨係o係海邊落水的就係玩水?
同事C:  係呀~~~
Jimmy:  咁~  去長龍水上樂園的, o係個池中間, 係游水定玩水呢?
同事C:  邊有咁計的?  都唔同性質...

依個同事真係得意~~~

剛剛見到有個小妹妹在公司打電郵,

望到佢鍵盤旁有張公司各部門的聯絡表.

正有點奇怪....

Jimmy  :  妳o係度做緊乜?

小妹妹M: 打緊電郵law~

Jimmy  :  咁妳對住個部門聯絡表做乜?

小妹妹M: (碌大隻眼)  o下?  唔係咁打點打呀?

Jimmy  :  打電郵要對住個部門聯絡表的咩?

小妹妹M: 咁唔係咁點知佢o地個Email 係乜呀?

Jimmy  :  (心中已大驚)  妳冇入到個通訊錄的咩?

小妹妹M: 咩係通訊錄?

Jimmy  :  咪就係...  (用手指了一指Microsoft Outlook "收件者"的位置) 依個law~

(一 click 後...)

小妹妹M: 哦~~~  原來係咁的.

更精彩的o係下面......

Jimmy  :  乜妳唔識咁做的咩?  咁妳平時發電郵時都係咁對住打的?

小妹妹M:  係的...   唔係點 send 呀?

Jimmy  :  (唔通佢唔知有"通訊錄"依樣o野?)  咁妳平時點 send 電郵比妳尐 friend 的?

小妹妹M: o下?  唔 send 電郵的, MSN 咪得law~~

Jimmy  :  咁佢o地冇 online 呢?

小妹妹M: 咪打電話law~~~

Jimmy  :  唔 send email 的?

小妹妹M: 唔會 send 電郵o個wu~~~  我個 email 都唔開的.

Jimmy  :  ............

後記:  話說我4年前就遇到一個小女子,

 當日佢同我講佢個電郵係約一個月先會 check 一次

 我已經諗緊佢到底係咪正常人...

 想不到今天我在辦公室遇到一個更強(同時更後生)答案.

 還是在香港...  有更多我未接觸過, 但又十分精彩的圈子呢? 

話說我已經以為自己醒目,

每過幾日先遞一張支票申請比會計呀頭中的呀頭開票.

點知佢儲麻曬先一次睇...  結果係三張一齊睇.

佢一睇到就走出來問我,

會計呀頭中的呀頭:  點解開咁多票出來比佢的.

Jimmy :  依尐係妳公司要攪冷氣的工程費來的.

   o拿o拿, 依兩份係一齊的, 一筆係中期, 依一張係尾期,

   而依一份係另一項工程來的.

會計呀頭中的呀頭:  有冇咁多o野要攪呀~~~???

Jimmy :  有冇咁多o野攪???  妳依家成個辦公室都攪緊冷氣, 妳睇唔到咩?

會計呀頭中的呀頭:  (諗o左一諗)  咁多張...  我淨係開住依張算啦~~~  其他我一號(01-08-2009) 先開.

Jimmy :  咁點得呀~~~  人o地同妳做好曬, 做好就要找數比人的, 唔係人o地點食飯呀?

會計呀頭中的呀頭:  得啦~~~  一張算啦~~~  咁多張....

Jimmy :  (知道講多都冇乜用)  得得~~~  唔緊要~  妳照開啦~~~  咁人o地來追數的時候我叫佢入來找妳~

會計呀頭中的呀頭:  (馬上轉軚)  o下~  咁唔好了~  

之後就咁走o左~~~ 

剛打電話比個未返的同事...

電話響了數十下...

Jimmy: 喂喂, 你今日係咪睇日食定放假的?

同事I: o下? (2秒後) 呀~~~ 我依家返來的了~~ 係係...

Jimmy: 哦? (估到乜事) 咁不如你睇麻日食先啦~ 我都想睇

同事I: 咪玩啦~  我...  (又延遲幾秒...)  我依家返來的了~~~